Rayon Partiya Təşkilatı sədrinin müavinləri

 1.İbrahimov Eldar Rza oğlu  – 1945-ci il martın 12-də Azərbaycan Republikası Naxçıvan Muxtar Respublikasının Babək rayonunun Cəhri kəndində anadan olmuşdur. Əmək fəaliyyətinə Naxçıvan tikinti idarəsində başlamışdır. 1970-ci illərdə Azərbaycan Kənd Təsərrüfatı İnstitutunu bitirmişdir. 1963-cü ildən istehsalatda müxtəlif vəzifələrdə çalışmışdır. 1980-1982-ci illərdə Naxçıvan vilayət partiya komitəsində təlimatçı, 1982-1985-ci illərdə Naxçıvan MMSR K/T texnikası birliyinin sədri, 1985-1988-ci illərdə Naxçıvan MSSR Dövlət Aqrar Sənayə Komitəsinin sədr müavini, 1988-1991-ci illərdə Naxçıvan MSSR Nazirlər Soveti sədrinin birinci müavini, dövlət aqrar sənayə komitəsinin sədri, vilayət partiya komitəsinin büro üzvü olmuşdur.1993-cü ildən Naxçıvan MR Baş nazirinin birinci müavini, Dövlət İqtisad və Plan komitəsinin sədri vəzifələrində işləmişdir. Naxçıvan MR Ali Sovetinin (1995) və Azərbaycan Respublikası Ali Sovetinin (1990), Azərbaycan Respublikası I, II, III, IV, V çağırış Milli Məclisinin deputatı seçilmişdir. Milli Məclisdə Aqrar Siyasət Komitəsinin sədridir. Yeni Azərbaycan Partiyasında İdarə Heyətinin üzvüdür. Evlidir, 3 övladı var.

 2.Hüseynli Əli Məhəmməd oğlu- 1968-ci ildə Bakı şəhərində anadan olmuşdur. 1985-ci ildə Bakı şəhəri, Binəqədi rayonu 135 saylı orta məktəbi bitirmişdir. 1985-1986-cı illərdə Rusiyanın Kalinin vilayəti “Kalininselstroy” tikinti idarəsində fəhlə işləmişdir. 1987-ci ildə Kalinin Dövlət Universitetinin hüquq fakultəsinə daxil olmuşdur. 1988-1989-cu illərdə hərbi xidmətdə olmuşdur.1993-cü ildə Bakı Dövlət Universitetinin hüquq fakultəsini bitirmişdir.1991-1995-ci illərdə Azərbaycan Respublikası Ali Məhkəməsində,  1995- 1996-cı illərdə Azərbaycan Respublikası Prezidentinin İcra Aparatında, 1996-2000-ci illərdə isə Azərbaycan Respublikasının Milli Məclisində müxtəlif vəzifələrdə çalışmışdır. Hüquq elmləri doktorudur. 2000-ci il 5 noyabr və 2005-ci il 6 noyabr Parlament seçkilərində Milli Məclisə deputat seçilmişdir. 2003-cü ildən hal-hazıra kimi Milli Məclisin Hüquq siyasəti və dövlət quruculuğu Komitəsinin sədridir. Azərbaycan Respublikasının Avropa Şurası Parlament Assambleyasında nümayəndə heyəti rəhbərinin müavinidir. Azərbaycan Respublikası Məhkəmə Hüquq Şurasının üzvü olub. Azərbaycan Respublikasının Korrupsiyaya qarşı mübarizə üzrə Komissiyasının üzvüdür. Ailəlidir, 2 övladı var.

 3.Əsgərov Hüseyn Abbas oğlu – 1958-ci ildə Naxçıvanda anadan olmuşdur. Azərbaycan Dövlət Universitetini  Filoloq ixtisası üzrə bitirmişdir.1981-1984-cü illərdə Azərbaycan Respublikasının Sabirabad rayonunda Azərbaycan dili və ədəbiyyatı müəllimi, 1984-1997-ci illərdə Azərbaycan EA Nəsimi adına Dilçilik İnstitutunda elmi işçi  vəzifəsində çalışıb.  1997-ci ildən bu günə kimi Bakı Dövlət Universitetinin Azərbaycan dili və onun tədrisi metodikası kafedrasında müəllim, baş müəllim, dosent, professor kimi fəaliyyət göstərir. 2007-ci ildə filologiya elmləri doktoru dərəcəsinə nail olmuşdur. 2003-2006-cı illərdə Azərbaycan Respublikası Təhsil Nazirliyi Binəqədi Rayon Təhsil Şöbəsinin müdiri kimi çalışıb.  Azərbaycan Respublikası Prezidentinin 2012-ci il 10 oktyabr tarixli Sərəncamı ilə “Əməkdar müəllim” fəxri adına layiq görülmüşdür.Təhsil nazirinin 3 avqust 2006-cı il tarixli 11/385 nömrəli əmri ilə  Bakı Şəhəri üzrə Təhsil İdarəsində müdir müavini vəzifəsinə təyin olunmuşdur. Evlidir, 2 övladı var.

 4.İsmayılov Vüsar Qəşəm oğlu - 6 aprel 1973-cü ildə Şərur rayonunun Çərçiboğan kəndində anadan olmuşdur. 2002-ci ildə Azərbaycan Beynəlxalq Universitetinin hüquq fakultəsini, 2006-cı ildə AR Prezidenti yanında Dövlət İdarəçilik Akademiyasının Dövlət və bələdiyyə idarəetməsi fakultəsini bitirmişdir.1990-1993-cü illərdə Şərur rayonu 16 saylı mexanikləşdirilmiş səyyar dəstədə II dərəcəli fəhlə kimi əmək fəaliyyətinə başlamışdır. 1994-1997-ci illərdə YAP Şərur rayon təşkilatının “İnam yolu” qəzetində şöbə müdiri, 1997-2000-ci illərdə Təsərrüfat hesablı təmir-tikinti idarəsində hüquq məsləhətçisi, 2000-2001-ci illərdə 3 saylı mənzil tikinti trestinin 18 saylı təmir tikinti idarəsində hüquq məsləhətçisi, Nərimanov rayon ƏƏSMM-də pensiya üzrə müfəttiş, 2001-2008-ci illərdə Binəqədi Rayon İcra Hakimiyyəti başçısının Aparatında İctimai təşkilatlar və siyasi partiyalarla iş şöbəsinin müdiri vəzifələrində işləmişdir.Bakı şəhəri Binəqədi Rayon İcra Hakimiyyəti Başçısının 26 may 2008-ci il tarixli 22 nömrəli Əmri ilə Binəqədi Rayon İcra Hakimiyyəti başçısının müavini vəzifəsinə təyin edilmişdir. Dövlət qulluğunun müşaviri ixtisas dərəcəsini almışdır. Ailəlidir, üç övladı var.

 5. Zeynalova Tünzalə Həsən -  7 fevral 1969-cu ildə Tovuz rayonunda anadan olmuşdur. A.S.Puşkin adına orta məktəbi bitirdikdən sonra N.Tusi adına Azərbaycan Pedaqoji Universitetinin tarix fakültəsinə daxil olmuş və 1990-cı ildə tarix müəllimi ixtisası üzrə bitirmişdir. 1990-cı ildən Bakı şəhəri, Nəsimi rayonu 144 saylı tam orta məktəbdə müəllim, daha sonra müəllimliklə yanaşı təşkilatçı və təlim-tərbiyə işləri üzrə direktor müavini vəzifəsində çalışmış, 3 sentyabr 2015-ci ildən Binəqədi rayonu, 283 saylı tam orta məktəbin direktoru vəzifəsində işləyir.1993-cü ildən etibarən MSK-nın üzvü, katibi və sədri vəzifələrində işləmişdir.19 sentyabr 2000-ci ildən YAP-ın üzvüdür. Ailəlidir, bir övladı var. 

All rights reserved.