Moskvadakı M.İ.Rudomino adına Xarici Ədəbiyyat Kitabxanasında tanınmış rejissor, kino və teatr rəssamı Əddis Hacıyevin ilk hekayələr toplusunun təqdimatı keçirilib.

təqdimat mərasimi Heydər Əliyev Fondunun Rusiya nümayəndəliyi tərəfindən təşkil olunub. “Böyük şəhərlərdə həyatın xüsusiyyətləri” Əddis Hacıyevin rəsm əsərinin və eyni zamanda, hekayələr toplusunun adıdır. Kitabda müəllif böyük şəhərlərdə yaşayış ilə bağlı öz düşüncələrini bölüşüb. Tədbir çərçivəsində Ə.Hacıyevin rəsmləri də təqdim olunub.

Ə.Hacıyev tədbirdə çıxış edərək bildirib ki, 15 ildən artıqdır kino sahəsində fəaliyyət göstərir, rəsm və qrafika çəkir. Yazıçılıq isə getdikcə onu özünə daha çox cəlb edən hobbidir. “Kitabda böyük şəhərlərdə həyatın müxtəlif cəhətlərindən söz açılır. Bu, mənim üçün maraqlı idi, çünki mən özüm də ömrüm boyu böyük şəhərdə yaşamışam”, - deyə müəllif bildirib.

Əddis Hacıyev həm Rusiyada, həm də xaricdə bir çox bədii filmlərin, televiziya layihələrinin və çox sayda televiziya reklamlarının vizual dizaynının müəllifi kimi tanınır. O, Azərbaycan Rəssamlar İttifaqının, Rusiya Dizaynerlər İttifaqının və Rusiya Kinematoqrafçılar İttifaqının üzvü, bir çox özəl və dövlət qalereyalarında saxlanılan rəsm əsərlərinin müəllifidir.

Heydər Əliyev Fondunun Rusiya nümayəndəliyinin humanitar proqramlar şöbəsinin rəhbəri Tamilla Əhmədova qeyd edib ki, Əddis Hacıyev çox məşhur və istedadlı Azərbaycan ailəsinin nümayəndəsidir. O, babası, Azərbaycanda kitab qrafikasının banisi Əmir Hacıyev və atası, Xalq rəssamı Altay Hacıyevin yollarını davam etdirir. “Əddis Hacıyev rejissor, ssenarist, prodüser kimi tanınırdı, bu gün isə biz onu yazıçı kimi təqdim edirik. Bu gün təqdimatını keçirdiyimiz kitabda hər bir şəhərin fərdi simasından bəhs edilir. Sözsüz ki, kitabda doğma Bakımızın da eskizlərini görürük”, - deyə Tamilla Əhmədova vurğulayıb.

Fəridə Abdullayeva